Thursday, November 3, 2016

WAA MAXAY BALANCE SHEET ?. SIDEESE LOO QORAA ?.Q1aad.


Warqadda dheellitirka (BALANCE SHEET) oo ay la socdaan warqadda caddeynta dakhliga (faa’iido iyo khasaaro) iyo dhaqdhaqaaqa lacagta cad (cash flow), waa qaababka ugu muhiimsan, ee lagu cabbiro awoodda dhaqaale ee ganacsiga (shirkadaha). Waxay koobtaa hantida shirkadda (ASSETS) deymaha lagu leeyahay (LIABILITIES) iyo xuquuqda milkiilayaasha (OWNER’S EQUITY). Waxaa loo isticmalaa si loo ogaado qiimaha guud ee ay shirkaddu joogto.
Si kooban, warqadda dheellitirku waxay tustaa hantida ay shirkaddu leedahay iyo deynta lagu leeyahay. Labadaas waxaa sii dheer, in warqadda dheelitirku ay caddeyso xuquuqda maalgaliyayaasha. Mar kasta, shirkadda hantideedu waa in ay la ekaataa deymaha shirkadda lagu leeyahay oo lagu daray xuquuqda maalgaliyayaasha.
Waxaa laga ma maarmaan ah, in la fahmo warqadda dheellitirka shirkadda, si loo hubiyo awoodda dhaqaale ee ganacsiga. Sida caadiga ah, marka hantida shirkaddu ay ka badan tahay deymaha lagu leeyahay, waxay ka dhigan tahay, in shirkaddu xooggan tahay dhaqaale ahaan, qiimaheeduna uu sarreeyo. Taas baddalkeed, marka deymaha shirkadda lagu leeyahay ay ka badan yihiin hantideeda guud, waxay ka dhigan tahay, in awooddeeda dhaqaale ay liidato qiimaheeduna uu hooseeyo.
Warqadda dheellitirka waxay ku  caawisaa milkiilayaasha iyo maamulayaasha, in ay fahmaan awoodda ama taagdaridda shirkadda iyo in ay meelmariyaan xeelado ku aaddan sidii horay loogu socon lahaa. Warqadda dheellitirku waxay ganacsiga ku caawisaa, in ay fahmaan badeecadda markaas xowliga ku socota inta bandanna waxaa la isticmalaa marka la la macaamilayo shirkadaha deymaha bixiya sida bangiyada iyo maalgaliyayaasha.
QAABKA QORISTA WARQADDA DHEELLITIRKA: Warqadda dheelitirku waxay sawir guud ka bixisaa qiimaha shirkadda waqti cayiman, sida dhammaadka sanadka. Waxaa muhiim ah, in la abuuro, dib u eegisna lagu sameeyo awoodda ganacsi ee shirkadda, si loo ogaado halka ay shirkaddu ku socoto.
Sida erayga ka muuqata, warqadda dheelitirku waxay ka kooban tahay laba tiir (column) oo xisaab ahaan is la siman.Tiirka hore wuxuu ka kooban yahay dhammaan hantida ay shirkaddu leedahay. Tiirka labaad waxaa lagu aruuriyaa deymaha shirkadda lagu leeyahay iyo xuquuqda milkiilayaasha sida ay muujineyso
isla egtan :Assets =Liability+ Owner's equity.
La soco qeybta labaad bisha danbe .
Qoraalkan markii ugu horreysay wuxuu kusoo baxay wargeyska Gobolada dhexe Bishii November 2016.
 
  

CILMI BAARIS LAGU SAMEEYAY MUWAADINIIN U KALA DHASHAY INGIRIISKA IYO SOOMAALIA


 Afar ruux oo laba Soomaali tahay labadana kalana Ingiriis yihiin ayaa cilmi baaris lagu sameeyay. Cilmi baarisktu waxay salka ku heysaa in lagu ogaado sida ay afartaas qofu u adeegsadaan xirfadaha ismaqalka , wada hadalka ,is qancinta iyo dhibaato xallinta .Waxaa koox kasta si gooni ah loogu dhiibay Caag laba midab oo kala gaddisan kooban. Caaggu dhinacna guduud ayuu ka yahay dhanka kalena caga...ar. Koox kasta waxaa loo qabtay in ay muddo toban daqiiqo ah kusoo saaraan midabka caagga.Shuruucda cilmi baarista waxaa ka mid ah in ruux kasta kaliya ku ekaado dhinaca soo jira ee uusan fiirin caagga dhinaciisa kale .
Doodii ayaa bilaabatay.
Labadii Nin ee Soomaalida aheyd :
Abdi: war haye gaaladaanu in ay na waalaan ayey rabaan caag uu indhooluhu xitaa arki karo midabkiisu inuu guduud yahay ayey na leeyiihin midabkiisa sheega . Balo idin heshay.
Faarax: Gaaladu caqli xumadaada ayey ogaayeen marka ay caaggan midabkiisa na weydiiyeen!. Ma caaggaan cagaarka ah ayaad leedahay waa guduud?!. Wallee adiga iyo gaaladii caaggaan cagaarka ah midabkiisa sheega na yiri in aadan kala rooneyn!.
Abdi: War illeen balo!. War ninyahow orod oo ookiyaalo soo xiro !.
Faarax: aniga ayaa kaa naxaayee , saaxiiboow , Karooto cun. Run ahaan indhahaagu baxar ayey ku jiraan haddiiba midabkii cagaarka ahaa ay guduud kaaga dhigeen.Intaas marka ay mareyso ayaa tobankii daqiiqo ee loo qabtay dhacday.
Dooddii Labadii Nin ee Ingitiiska ahaa:
Dunn: Waxaa nala faray in aan caaggaan midabkiisa soo saarno, soow ma ahan ?
Duff: Haa, waa runtaa. Aniga dhankeyga midabka caaggu waa cagaar.
Dunn: Hagaag. Sidaas si ka gaddisan anigu waxaan arkaa midab guduud ah !.
Duff: Markaas waxay ka dhigan tahay in caaggu laba midab oo kala gaddisan leeyahay?
Dunn: waa sidaas.
Waqtigii tobanka daqiiqo ahaa ee loo qabtay ayaa dhamaaday.
Ka dib kooxdii cilmi baarista sameeynaayay ayaa labadii nine e soomaalida ahaay weydiiyay midabka ay soo heleen. Mid ka mid ah ayaa yiri( Anigu waxaan soo ogaaday inuu caaggu cagaar yahay, ninkaan saaxiibkeey ahna wuxuu leeyahay caaggu waa guduud marka waa isku wareernay!). Wuxuu sii raaciyay “ haddii aad cilmi baaris danbe sameyneysaan nin wax arkaaya igu dara”. Kii kale oo xanaaqsan ayaa yiri “ war ninkaan waxba ma arko ee fadlan isbitaal u dira!”.
Labadii nin ee Ingiriiska ahaay ayaa la weydiiyay midabka ay soo heleen . Mid ka mid ah ayaa labadooda u hadlay wuxuuna yiri “ waxaan soo ogaannay in caaggu laba midab oo kala gaddisan leeyahay. Dhinac caggaar ah iyo dhinac guduud ah”.

FG: Cilmi barista aniga ayaa sameeyay, waana mid qiyaali ah .Kama dhigna in dhammaan soomaalidu ay sidaas u dhaqmaan.

Tuesday, January 26, 2016

Shacabkii la Dulleystay!.

Shacabkii la dulleystay !
Hadda ka hor ayaa laba madaxweyne oo midna Reer Galbeed yahay kan kalana Afrikaan yahay ayaa iyaga oo meel maqaaxi ah ku caweynaaya waxaa meel aan sidaas uga fogeyn ka dhacay qarax aad u xooggan . Labadii madaxweyne ayaa u orday halkii uu qaraxu ka dhacay.Madaxweynihii Reer Galbeedka markii uu goobtii gaaray ayuu wuxuu maqlay muwaadiniin waddankiisa u dhashay oo caawinaad dalbanaayay , isla markiiba intii uu caawin karo ayuu caawiyay , wuxuu sidoo kale u yeeray gaariga gargaarka degdegga ah (UMBLANCE).Madaxweynihii Afrikaanka ahaa ayaa asna isha ku dhuftay laba ruux oo waddankiisa ka soo jeeda kuwaas oo uu dhaawac ka soo gaaray qaraxa kaalmana u baahnaay, afka ayuu labadiisa gacan ka kala saaray si aan loo maqlin qeyla dhaantooda, labadii ruux halkaas ayeey ku naf waayeen.
Sheekadaan waxaan ku soo xasuustay, ka dib, markii aan aqriyay dacwad ka dhan ah Ra’iisalwasaaraha iyo wasiirka arrimaha gudaha dowladda federaalka ah ee soomaaliya Cabdirashiid Cali Sharmaarke iyo Cabdirahmaan Odawaa, oo loo gudbiyay Gudoomiyaha maxkamadda sare Ceydiid Cabdulaahi Ilka-xanaf.Dacwadda ayaa waxaa la sheegay in ay gudbiyeen xisbiyada ka jira waddanka oo tiradooda lagu sheegay laba iyo labaatan(22) xisbi siyaasadeed , sababtuna waxaa aheyd ayaa la yiri ka dib markii CCC iyo Odawaa ay ku xadgudbeen xuquuqda xisbiyada.
Bal raggaas maskaxdooda eega. Maalmo ka hor ayey aheyd markii shacab masaakiin ah lagu xasuuqay Xeebta liido, ma jiro hal xisbi oo arrintaas ka xumaaday , hadda aan qoraalka qoraayo Gobolka Gedo waxaa ka socda duqeyn cirka ah oo loo geysanaayo dadka shacabka ah ee Gobolkaas dega , Sidoo kale dowladda kiiniya waxay si aan gambad laheyn u sheegtay in Beel ka mid ah Beelaha soomaaliyeed ee dega Gedo in ay taageero siiyaan Al-shabaab , taas oo ka dhigan in ay Beeshaas bartilmaameedsan doonaan,weli amaad maqasheen siyaasi hebel ayaa ka hadlay dhammaan arrimahan xasaasiga ah ee aan kor ku xusay ? jawaabtu waa maya, maxaa yeelay, waxa uu dhibku gaaraayo shacaboow waa adiga, waxa dhimanayaa waa adiga, kan gaajada iyo harraadku dilaayaan waa adiga,kan caafimaad la’aantu iyo guri la’aantu heyso waa adiga,kan jaranjarta u ah siyaasiga ee uu ku Owr kacsado waa adiga , kan ay Al-shabaab dilaayaan waa adiga Kiiniya waxa ay dileyso ma ahan siyaasi ee waa adiga.

Ruux kasta ee Soomaaliya ku dhibtoon siyaasi ma ahan ee waa adiga shacaboow !!!.
Siyaasigu, ama Xalane ayuu ku jiraa oo dhagaxyaan waa weyn ayuu jidka ku gooystay gaari aysan xabbadu karina wuu dhex galay, ama Hotel iyo hooy qurxoon ayuu dhex dangiiga,sidoo kale waxaa u qaybsan naftiisa ilaalinteeda iyo dhimasho ka jirkeeda, waardiye adag oo habeen iyo maalin dul taagan, halkaas ayuu Tv-yada Wariyaasha maasaakiinta ah ka shaqeeyaan midba mar u yeertaa asaga oo dhereg dhacsanaya, dhididkiisuna subag yahay, barruurta korkiisa awgeed iyo caloosha ka horreysa dhawrka sintimitir.
Bulshooy, haddaad dib u eegto ninkaa siyaasiga ah, maalmo ka hor intaan xilka loo dhiibin, caato iyo weyd awgeed, dabayshaa rideysay, jamiista iyo jidhifta oogadiisana waxaad moodeysay, Qulka iyo malowga xeryaha ariga gala, maanta waa kaa cifanaya sidii, xooluhu ban geedo buuxaan lagu sii daayey.Siyaasiga carruurtiisu waxay waxay ku noolyihiin waddan nabad ah , taas waxaa la jira in in la bixiyo biilalkooda , waxbarashadooda , caafimaadkooda iyo cuntadoodaba.
Reer xamarka ayaa ku maahmaaha “Ishiis laga arkaa Ushiis lagu tumaa”, shacabka soomaaliyeed ma aaminsana in ay xaquuq leeyiihin, ma aaminsana in ay siyaasiga la xisaabtami karaan, ma aaminsana in ay yihiin awoodda dalka xukunta, ma aaminsana in ay siyaasiga xeer xiro iyo xad uu leeyahay, sidoo kale iyaguna xuquuq iyo xeer leeyihiin, wixii danahooda ahna kala xaajoon karaan, marka ay halkaas sheekadu mareyso siyaasigu sow xaq uma laha inuu iska indho tiro dadka la duqeeyay iyo kuwa la xasuuqay isla markaana raadsado xaq asaga shaqsi ahaan ka maqan.
Haddaad aragto qof lixdiisa laxaad qaba oo albaab hor taagan uu furihiisa gacanta ku haysto, markaad weydiisona uu kuugu jawaabo, waxaan sugayaa qof iga fura, la yaab, haddaad dhahdo, furahana muxuu ahaa wuxuu? Uu kuugu warceliyo, waa kii albaabka, maxaad u furi weyday haddaad dhahdona, ku yiraahdo, ma awoodo, oo albaabka intaas le’eg ma furi karo, waxaad markiiba qofkaas ku sunteysaa, DOQON maya DABAAL iyo qof garaadka naafo ka ah, sax waa yahay.
Shacabka iyo bulshada Soomaaliyeed waa inay dareemaan, inay albaabka furi karaan(Siyaasiga) Lana hadli karaan, la doodi karaan, dhaliili karaan, ku bannaanbixi karaan, la xisaabtami karaan, iyagoon hub qaadan dagaal iyo duulaana gelin.Maskaxdu ha shaqeyso, dadkuna xaqooda ha ogaado, Siyaasuguna inuu adeege bulsho yahay waa inaynu baranaa, hadduu noo adeegi waayona aynu kalsoonida kala laabano, shaqadana aynu ka cayrino.

  • Waa duni la kala iibsaday, oon nala ogeysiine
  • Waa duni akhyaartii go’day, oo aaran soo hadhaye
  • Waa duni ninkaad aamintaa, kuu abees yahaye
  • Anse ila ah aakhiro sabaan iligyadiisiiye.
Qormadaan Markii ugu horreysay waxay kusoo baxday website-ka caanka ah ee www.laashin.com

Friday, January 22, 2016

Ka foojignaaw ruuxa aragtida Gurracan !.

Ka fogaaw Ruuxa aragtida Gurracan leh .
Markasta ee uu afka kala qaado xummaan ayuu ku hadlaayay, ma aysan jirin hal mar oo uu wax wanaag ah ii sheegay . waxaan dareemay in wax kasta oo wanaag ah oo aan arkaayay oolyo dusha looga shubay , ka waran adiga oo subaxdii aroor hore afar xabbo oo canjeero/ laxoox ah saxan laguugu soo riday kaddibna si lama filaan ah Oolyo lagaaga shubo maxaad dareemi laheyd ? . Wax kasta waxay ahaayeen rajo la’aan , macno la’aan , dadku waxay ahaayeen caqli la’aan , rajo la.aan . Fikraduhuna waxay ahaayeen kuwo aan macquul aheyn oo ay adag tahay in ay suuro galaan . Waan hubaa hadda waxaa niyadda kaaga soo dhacay ruux la mid ah saaxiibkeey Faarax ( magac beenaad ). Faarax wuxuu aad u jecel yahay inuu faafiyo Propogaandada iyo kutirikuteenta , xataa hadii ay arrintu u dhici weyso sida uu qiyaasay wuxuu isku dayaa inuu muujiyo in uu run sheegaayay.
Dadka aragtida Gurracan leh kuma noola nolol ay farxad iyo guulo ku dheehan tahay , waxayna jecel yihiin in ay kugu daraan nolosha ay ku nool yihiin , sidaas darteed waxaad u baahan tahay inaad inta ay goori goor tahay is badbaadiso oo aad ka dheeraato asxaabta aragtida Gurracan u saaxiibka ah .

Waalidu waa inaad sameysaa wax isku mid ah marar badan haddana aad sugtaa natiijooyin kala duwan ( Albert Einstein ).

Marka hore Waxaan halkaan tacsi uga diraayaa dhammaan ummadda soomaaliyeed , kaddib waxaan si hoose ugu tacsiyeynaaya dhammaan intii ehel, qaraabo , asxaab, walaalo, waalid iyo caruurba ku waayay weerarkii xalay ee Liido lagu qaaday .
Mudane Madaxweyne Laba sawir oo aad LIIDO kusoo gasho waxba uma taraayan dadkii ehelkoodii ku waayay weerarkii xalay. Waxayna ka dhigan tahay Meeshii xalay ehelkiinnii lagu laayay aniga ayaa saakay sawir kusoo galay ee I arka !.
Mudane Madaxw...eyne waxaa loo baahan yahay in aan wax ka bedelno xeeladdii ay dowladdu u dajisay sidii nabad gelyo waddanka loogu soo dabaali lahaa mar haddii ay shaqeyn weysay. Waxaan marnaba caqli gal aheyn in qaab aan u jeedno in uusan shaqeyneyn in aan si indho maqiiq ah ugu sii shaqeyno. Haddii aad rabo inaad hesho natiijo ka bedelan tii hore waa inaad wax ka bedeshaa qaabkii aad wax u qaban jirtay jidkii aad raaci jirtayna aad bedeshaa. Imisa qarax oo nuucaan oo kale ah ayaa Intii aad xilka heysan Mugdishu ka dhacay ?, ma jiraan wax tallaabo ah oo ay dowladaadu qaadday ?.Mudane madaxweyne , meesha dhibka ugu weynu uu ka jiro waa dhanka sir doonka iyo wasiirka amniga iyo kan sirdoonka oo aan aqoon baaxsan u laheyn arrimaha la xariira sirdoonka iyo ka hor tagga weerarada nuucaan oo kale ah. Mudane madaxweyne goorma ayaan arki doonnaa adiga oo xilalka la xariira ciidamada iyo sirdoonkaba u magacaaba dad qibrad u leh shaqadooda ?!. Waxaan hubaa in ay jiraan rag ka qibrad iyo xirfad badan kuwa hadda jagooyinkaas haaya!...
Waxaa hubaal ah in marka ruux kasta shaqada uu qaban karo loo magacaabo in markaas ay fududaan doonto in lala xisaabto ruuxaas , balse qof aan waxba ka ogeyn waxa uu qabanaayo qaab aan la aqoonna lagu shaqaaleysiiyay sideed ula xisaabtami kartaa?.

Friday, May 29, 2015

Su’aalaha ugu muhiimsan wareysiga shaqo raadinta iyo qaabka
looga jawaabo.
                     (interview-ga)
Walaalkeyga shaqo raadiska ahoow,qoraalkan gaaban waa mid ku saabsan habka iyo hannaanka ugu fudud, ee aad uga jawaabi karto, Su’aalaha shaqa bixiyahaaga.
Waxaan ku gula wadaagi doona oo aan ku soo bandhigi doonaa 5-ta su’aal ee ugu muhiimsan wareysiga iyo qaabka looga jawaabo:-
Marka aad qoraalkan aqrisato waxaad helaysaa aragti fog, oo ku aaddan sida looga jawaabo weydiimaha lagama maarmaanka ah, waxaadna ka badbaadi doontaa waayo aragnimo darro inta badan ku dhacda dadka, kuwaas oo kaa hor istaagi karo kuna waayi kartid in aad hesho shaqada aad jeceshahay.
Su’aasha 1-aad:-
Haddii lagu weydiiyo Naftaada maxaad iiga sheegi kartaa?
Marka aad maqasho weydiintan lagu weydiiyo ha u qaadan in ay tahay fursad aad uga sheekeyso noloshaada ama aad dib ugu aqriso meerta nololeedkagii oo dhan (CV).
Adiga oo hadalkaaga soo koobaaya ,qeex kaalinta hawleed aad ku firfircoon tahay aadna isleedahay waad ku xooggan tahay (strengths) sidoo kale ha ilaawin inaad sheegto qibradaada iyo heerka ay waxbarashadaadu gaarsiisan tahay , sidoo kale waxaa muhiim ah inaad sheegto waxyaalaha ugu muhiimsan ee aad soo xerogalin karto (accomplish), jawaabtaadu yeeysan qaadan waqti ka badan 60 il biriqsi (hal daqiiqo).
Su’aasha 2aad:-
Majiirahaaga iyo hadafkaaga hawleed waa maxay ?
Inta badan dadka shaqada raadinaaya waxay ku dhacaan dabintaan oo waxay dusha ka aqriyaan dhammaan waxa ku qoran warqadihiisa shaqo iyo faahfaahintooda .
Waxa kaliya ee lagaa rabo marka aad su’aashaan ka jawaabeyso waa in aad sheegtaa meelaha aad ku xoogan tahay(Kartidaada shaqo) oo aad isleedahay waad kasban kartaa Shaqa bixiyaha ku wareysanaya . Jawaabta su’aashaan kama foga Su’aasha Koowaad.aad iskugu dhawyihin.
Su’aasha 3aad:-
Maxaad kaga duwantahay tartamayaasha kale?
Jawaabtaadu waa inay noqotaa mid aad faahfaahin mug leh ka bixisid, waayo aragnimada iyo hawlkarnimadaada shaqo, sidoo kale waa inaad odorostaa, hawlgalada cusub iyo hannaanka shaqo ee aad la iman doonto, kaasoo aad is leedahay waa mid gelaya oo u dusaya dhegaha shaqa bixiyaha ku wareysanaya
Arrintan waxaa ka caawin kara inaad marka horre soo aqristo, Shirkada U Shaqo tegayso, da’deeda, inta goobood ay ku taallo, shaqada ay qabato, iyo meesha aad is leedahay meeshaas way ka xagal daacsantahay.
Tusaale ahaan waxaad dhihi kartaa”Waayo aragnimadeydu waa mid keeni karta guul ay shirkadu ku talaabsato, adigoo meel dhawr ah taabanaya, kagana hormarto shirkadaha kale, Tusaale shirkada aad u shaqo tegaysaa haddii ay tahay Shirkad dharka iibisa inaad tiraahdo waxaan awoodaa inaan shirkada ku soo xidho ganacsato cusub, ama haddii ay tahay shirkad wax iibisa inaad tiraahdo waxaan awoodaa inaan macaamiil cusub idiin keeno”.
Su’aasha 4aad:-
Shaqadaadii hore maxaad uga tagtay?
Su’aashani waxay ka mid tahay kuwa ugu adage ee laga yaabo inaad la kullanto ama lagu weydiiyo, marka aad shaqo raadis tahay waxaad iska ilaalisaa inaad faallo xun ka bixiso maamulayaashaadii hore iyo sidoo kale shaqaalihii aad isla soo shaqeyseen, sida inaad tirhaado “waxaan shaqada uga tagay dabeecad xumada maamulaheygii hore, ama shaqaalihii hore aan isla soo shaqeynay waxay ahaayeen kuwo aad u xun”.
Hadii shaqadaadii hore laga soo buriyay/ceyriyay isku day inaad isku darto koox wada socotay oo shaqada ka tagay. tani waxay kaa taageeraysaa dhinaca sumcadaada inaadan ahayn mid gudbinaya, meelaha ay ka liitaan shirkadaadii hore iyo mida cusuba.
Su’aasha 5aad:-
Wax ma iiga sheegi kartaa meelaha aad ka liidato ama aad taagta darran tahay?
Sababta su’aashan laguu weydiinaayo waa in lagaa helo, meel ana boog shaqadan inaad qabato kaa hor istaagi karto, waxaad iska ilaalisaa inaad sheegto caddeymo sababi kara kuu diidi karo inaad qabato shaqada aad wareysiga u galeyso. Tusaale: Haddaad dhahdo waa hurdo jeclahay, waxay keeni kartaa in lagu arko inaadan waqtiga ilaalineyn shaqada oo hurda kula tegi karto.
Balse waxaad dhihi kartaa “waxaan aad u jeclahay cunitaanka macmacaanka, markasta oo aan arko waxaan jeclahay in aan dalbado”.
Waxaad kaloo sheegi kartaa meel aad ku liidato laakiin aan wax xariir ah la laheyn shaqada aad wareysiga u galeyso Tusaale ahaan hadii aad wareysi u galeyso xisaabiye oo su’aashan lagu weydiiyo waxaad dhihi kartaa “Waxaan ahay ruux aad u beer jilicsan oo aad u calool xumooda marka uu arko dad dhibaateysan” ,ogsoonaaw arrinta liidashadaadu wax xariir ah lama lahan shaqada aad wareysiga u galeyso.
Su’aalaha kale ee lagu weydiin karo aad ayey u badan yihin waxaana ka mid noqon kara :
  • Wax ma iiga sheegi kartaa meelaha aad awoodda ku leedahay/ku xooggan tahay?
  • Booska ad isku soo sharraxday aqoon intee la eg ayaad u leedahay?
  • Waqtiga aad fasaxa tahay maxaad qabataa?
  • Shan sano ka dib halkeed rabtaa inaad joogto?
FG: Qoraalkan wuuxu markii uGu horreysay kusoo baxay Mareegaha caanka ah ee www.laashin.com.

http://laashin.com/?p=1533.

Wednesday, May 6, 2015



U KALA QAYBIN QAAB QABIIL  MAGAALO QADIIMI AH.
Xilligii Dowladdi Kacaanka ay waddanka ka arrimin jirtay ayaa waxaa la yiri waxaa jiray Nin iyo xaaskiisa oo aad u jeclaay Jaalle Maxamed Siyaad barre lana dhacsanaay siyaasaddiisa ,waxay ahaayeen labo ruux oo aad ugu riyaaqsanaay Siyaasaddii kacaanka , waxaa laga marti qaadi jiray xaflad kasta oo uu kacaanku lahaay. In Muddo ah ka dib Ninkii naagta qabay ayaa xanuunsaday oo Sariir fuulay .
Nin la dhashay Guulwadihii xanuunsanaa ayaa maqlay xanuunka walaalkiis wuuxuna go’aansaday inuu soo booqdo Markii uu guriga yimid ayuu wuuxu arkay Dumaashidiis oo Heesihii Kacaanka dhegaha uga daartay Ninkeedii xanuunsanaa Markaas ayuu wuxuu yiri “ Dumaashi waad u jeedaa in ay walaalkey xaaladiisu xun tahay ee Fadlan Quraan u daar oo heesahaan ka dami”.
Dumaashidiis ayaa aad u xanaaqday waxayna Tiri” Haddi aad mar danbe tiraahdo Heesaha kacaanka dami waan ku dacweyn doonaa”.
Ninkii wuu iska indho tiray warkii dumaashidiis oo wuuxu bilaabay walaalkiisa oo markaan sakaraad ah inuu quraan ku aqriyo kana codsado inuu Xaaskiisa u sheego in ay heesahan ka damiso Madaxa ka galay, Ninkii kacaanka jeclaay asiga oo madax adeygaayaa oo diidan inuu taageradii uu kacaanka u haayay ka laabto heesahana la damiyo ayey naftii ka baxday.
Xaaskiisii oo aad u murugeysan ayaa waxay tagtay xaruntii booliis ee ugu dhaweyd waxayna geysay dacwad ka dhan ah Ninkeeda walaalkiisa, Dacwadii xoogaa marka ay socotay ayaa ninkii waxaa lagu xukumay 5 sano oo xarig ah iyo 50.000 oo shilin soomaali ah, ninka waxaa lagu eedeeyay "Marin Habaabin Marxuum kacaan".
Maanta waxaan u jeedna In xasan Sheekh oo ah madaxweynihii waddanka iyo Gaas oo asna ah Madaxweynaha Puntland ay ku dhiiradeen in Gaalkacyo la kala jabsado oo Labada qolo ee meeshas wada dega qolaba jab qaadato Arrintaasi qalalaase tiro badan ayay sababi kartaa kaas oo ah in Maamul Goboleed kasta uu ku andacooto in qaab qabiil Degmooyin ama Tuulooyin loo soo raacsiiyo, Tusaale ahaan Degmada Matabaan oo hiiraan ka tirsan, iyo sidoo kale Degmada Ceeldheer oo Galgaduud ka tirsan ayaa laga yabaa in ay ku kala biiraan Sh/dhexe iyo Galgaduud, Sida ay u kala horeeyaan.
Haddii aan xasan sheekh maxkamad soo taagi lahaa waxaan ku eedeyn lahaa U kala qeybin Qaab Qabiil Magaalo qadiimo ah.